納匝肋人耶穌Jesus von Nazaret 讀後感

It's Ratzinger again :) 呢排睇本篤嘅書睇得有啲上癮，所以就睇埋呢本巨著。我覺得呢本中文翻譯唔錯，睇嘅時候有種新鮮感。唔知係咪自己睇慣咗本篤啲書，呢次不但覺得呢本書唔譖氣，反而覺得好引人入勝。唔知係翻譯得好，定係本篤嘅寫作方式神奇，定係呢次嘅內容令我感興趣，我認為呢本書係一個基督論之大雜燴，內容包括好多舊約中天主與以色列人之間嘅盟約點樣指向耶穌基督。於此想分享我自己最覺得有趣嘅一節：點解猶太人至今仲未皈依天主教？最crucial嘅地方就係佢哋未能接受得到耶穌自認為天主。本篤用咗一位好虔敬嘅猶太經師一本書作討論，該書係關於該猶太經師默想山中聖訓嘅情景。呢位經師對耶穌所講嘅道理都感到驚奇不已，但係講到耶穌教訓人嘅權威呢方面，卻有種未能接受嘅地方。先用耶穌同其門徒係安息日採麥子食嘅事件開始講，呢位經師其實能過接受認同其行為，因為耶穌係「司祭」，所以冇問題。個問題反而係關於耶穌所帶來嘅十誡上嘅更新，為佢哋自認天主所啟示，一個特選嘅民族，感覺到一種自古以來嘅傳統迎來耶穌嘅「更新」大衝擊，有如所有傳統文化 - 即其民族身分象徵 - 都變得不是必要嘅感覺。其實諗深一層，只要耶穌係天主，所有更新 - 並非廢除 - 就會便得合理。再加上耶穌係講授經文嘅權威，並非於普通經師，而是因為佢係天主子，所有舊約嘅承諾都係佢身上實現。簡單講句，係猶太人未能接受耶穌自認為天主。

有時睇呢啲書好開心，因為睇嘅時候，有如將洋蔥啲皮一層一層搣，係一種奧祕，係一種有如去理解天主俾人類嘅禮物 - 智慧，將呢份禮物拆開，而當你拆開咗，雖然好滿足，而你又知道自己只係理解咗呢個浩瀚無窮嘅知識嘅冰山一角，有種想繼續搵落去嘅感覺。

不過，我自己覺得去理解天主，又唔可以單單從學術，純知識咁去理解。係睇本篤嘅書嘅時候，我感受到一種靈修嘅元素，姐係我覺得本篤佢自己係做咗好多祈禱，係天主面前會自訟自承，正個生命都係願意打開俾天主咁樣。

差開話題講，之前去聖瑪利安老院同啲修女傾計，佢哋談論天主嘅時候，冇講一啲好深奧嘅知識，只係好單純地講一啲祈禱，補贖，愛。但係係佢哋講天主嘅時候，我感受得到佢哋對天主嘅真誠同愛 - 有啲嘢係呃唔到人，係一份真誠。

前幾日同神師傾偈，自己明白到一個事理 - 知識只係一種幫助，最緊要嘅係我哋幾願意將自己交托俾天主。聽落去好似cliché，但其實呢啲道理入邊，又係有一種奧祕，係需要透過祈禱同對天主嘅真誠先能夠明白嘅箇中道理。

最後，又想提及前幾日同朋友去澳門USJ聽seminar時明白嘅道理 - "People can live without faith and love, but not without hope... Without hope in God, there is no hope."

係呀，呢啲說話我哋成日聽，但係能夠明白幾多，又係一個personal question了。願我們每人到能夠真誠地認識這位 perfectus homo, perfectus deus - 納匝肋人耶穌。